07.04.2019-cu il tarixində Psixologiya Elmi-Tədqiqat İnstitutunda Ümumdünya Sağlamlıq Gününə həsr olunmuş SAĞLAMLIQ PSİXOLOGİYASI KONFRANSI keçirildi.

Qeyd edək ki, 1948-ci ildə birinci Ümumdünya Səhiyyə Assambleyası Ümumdünya Səhiyyə Təşkilatının yaradılmasını qeyd etmək üçün Ümumdünya Sağlamlıq Gününün təsis edilməsi təşəbbüsü ilə çıxış etdi.  1950-ci ildən başlayaraq hər il 7 Aprel tarixində Ümumdünya Sağlamlıq Günü qeyd edilir. 
Azərbaycan Respublikasının Dövlət Himni səsləndirildikdən sonra tədbir açıq elan edildi. 
Öncə açılış nitqi və "Gözəl düşünən sağlam olar" mövzusunun təqdimatı üçün söz Psixologiya Elmi-Tədqiqat İnstitutunun rəhbəri Elnur Rüstəmova verildi. O, öz təqdimatında "Sağlam ruhda sağlam bədən olar" fikrindən çıxış edərək insanın ruhi sağlamlığını təmin edən əsas məqamlardan danışdı və sağlamlığın insanın düşüncələrilə bağlı olduğunu önə çəkdi. 

Növbəti çıxış üçün söz həkim-dietoloq, ESPEN-in yeganə Azərbaycanlı üzvü Tutu Zeynalovaya verildi. Spiker "Sağlam qidalanma və həyat tərzi" mövzusunda təqdimat edərək öz çıxışında hər kəsi sağlam qida rasionlarından istifadə etməyə və bol su içməyə səslədi. "Sağlam həyat sağlam qidalanmadan başlayır" -deyə əlavə etdi.
Daha sonra çıxış üçün söz Azərbaycan Respublikası Səhiyyə Nazirliyi, Psixi Sağlamlıq Mərkəzinin psixoloq-psixoterapevti, Azərbaycanda aykido psixoterapiyası ilə məşğul olan yeganə mütəxəssis, "Əli və Nino" filminin baş prodüsseri, hal-hazırda çəkilən "Satılmış ruhlar" psixoloji serialının baş prodüsseri və psixoloq rolunun ifaçısı Rövşən Nəzərova verildi. O, "Sağlam düşüncə - yaşam harmoniyası" mövzusunda təqdimat edərək hər şeyin sağlam düşüncədən başladığını qeyd etdi. 
Çay fasiləsi üçün ayrılan vaxt bitdikdən sonra konfrans öz işinə davam etdi.

Neyro-psixoloq, Boğaziçi Universiteti Klinik Psixologiya bölümü üzrə uzman, Türk-Amerika Neyropsixiatriya Dərnəyinin üzvü, Zirvə Psixologiya Mərkəzinin həmtəsisçisi və müdiri, Neyropsixologiya Bakı Mərkəzinin sədri Nuranə Kazımovaya söz verildi. O, sağlamlıq anlayışına neyro-psixoloji aspektdən yanaşaraq,  öz çıxışında daha çox yuxunun insan sağlamlığı üçün vacibliyindən danışdı.
Növbəti çıxış üçün söz Azərbaycan Respublikası Təhsil İnstitutunun "Psixologiya və Yaş fiziologiyası" şöbəsinin böyük elmi işçisi və dissertantı, psixoloq, musiqişünas Bahar Bəylərova-Ələkbərovaya verildi. "Sağlam musiqi - sağlam psixo-fiziologiya" mövzunda çıxış edən Bahar xanım  musiqinin hələ ana bətnində olarkən insan psixologiyasına təsirindən, düzgün musiqi seçiminin insan sağlamlığı üçün önəmindən bəhs etdi. 
Son olaraq Psixologiya Elmi-Tədqiqat İnstitutu nəzdində fəaliyyət göstərən Təhsildə Psixoloji Xidmətə Dəstək Mərkəzinin direktoru Elxan Bəylərov " İnsan ruhu qədər sağlam, gənc və safdır" mövzusunda təqdimat edərək milli-mənəvi dəyərlərimizin ruh sağlamlığımıza təsirindən danışdı. 
Çıxışlar bitdikdən sonra məruzəçilərə Psixologiya Elmi-Tədqiqat İnstitutu adından Təşəkkürnamə təqdim edildi. 
Bununla da SAĞLAMLIQ PSİXOLOGİYASI KONFRANSININ birinci hissəsi başa çatdı. 
Yarım saatlıq fasilədən sonra konfransın ikinci hissəsində Orxan İskəndərlinin təqdimatında Yoqa Master-klassı baş tutdu. 

Psixologiya Elmi-Tədqiqat İnstitutu olaraq bu gün bizimlə olan dəyərli spikerlərimizə və tədbir iştirakçılarımıza təşəkkürümüzü bildirir, uğurlar arzu edirik.

16 mart 2019-cu il tarixində Psixologiya Elmi-tədqiqat İnstitutunda “Psixologiya və İnsan Resurslarının İdarə Edilməsi” forumu keçirildi. Mövzu üzrə yeni yanaşmalar və perspektivləri təqdim edən forum institutun nəzdində fəaliyyət göstərən Biznes Psixologiyası şöbəsinin təşəbbüsü ilə baş tutdu.

Azərbaycan Respulikasının Dövlət Himni səsləndikdən sonra açıq elan olunan forumda ilk olaraq Psixologiya Elmi-Tədqiqat İnstitutunun rəhbəri Elnur Rüstəmov “Psixologiya Elmi Tədqiqat İnstitutunun strukturları, insan resurslarının idarə olunmasında psixologiyanın potensialı və perspektivləri” mövzusunda çıxış etdi.  O, öz çıxışında İnstitutun strukturlarından, fəaliyyət planından, həyata keçirilən layihələrdən, qarşıda duran hədəflərdən, eyni zamanda Azərbaycan Respublikasının 7 dekabr 2018-ci il tarixli “Psixoloji yardım haqqında” qanunu və Azərbaycan Respublikası Prezidentinin 21 yanvar 2019-cu il tarixli fərmanını əsas tutaraq psixoloji xidmətin təşkilinə verilən tələblərə toxundu. Azərbaycan Respublikası Prezidenti İlham Əliyevin “Təhsil haqqında”  qanunda dəyişikliklər edilməsi barədə 12 iyun 2018-ci il tarixli qanunun tətbiqi haqqında imzaladığı fərman haqqında məlumat verdi. “Təhsil haqqında” Azərbaycan Respublikası qanununun 14.20-ci maddəsini forum iştirakçılarının nəzərinə çatdırdı. Elnur Rüstəmov sonda insan resurslarının idarə edilməsində psixoloji diaqnostika, psixoloji konsultasiyanın rolundan və korporativ psixoloji dəstəkdən danışaraq lazımı təlimatları qeyd etdi. 

Daha sonra Psixologiya Elmi-Tədqiqat İnstitutu nəzdində fəaliyyət göstərən “Biznes Pisologiyası” şöbəsinin müdiri, psixoterapevt Kənan Rəhimova söz verildi. K.Rəhimov "Kompetensiyalar modelinin tətbiqi" mövzusunda çıxış etdi. 

Daha sonra forum növbəti spikerlərin çıxışı ilə davam etdirildi. Hər bir spikerin təqdimatında aşağıda qeyd olunan ardıcllıq və mövzular üzrə müzakirə təşkil olundu:
Psixologiya Elmi-Tədqiqat İnstitutu nəzdində fəaliyyət göstərən Psixoloji Xidmət və Reabilitasiya Mərkəzinin psixoloqu, ADPU-nun Ümumi Psixologiya kafedrasının müəllimi, doktoranı Gülər Məmmədova "Motivasiya, korporativ dəyərlərin formalaşdırılması" mövzusunda təqdimat həyata keçirdi.

Psixologiya Elmi-Tədqiqat İnstitutu nəzdində fəaliyyət göstərən Psixoloji Xidmət və Reabilitasiya Mərkəzinin psixoloqu Reyhan Mirzağayeva "Şəxsi inkişaf - insanın karyera inkişafının psixoloji əsası" mövzusu üzrə çıxış etdi.

Psixologiya Elmi-Tədqiqat İnstitutu nəzdində fəaliyyət göstərən Psixoloji Xidmət və Reabilitasiya Mərkəzinin direktoru, psixoloq Nərmin Quliyeva "Psixodiaqnostika və psixoloji proqnoz" mövzusunda çıxış etdi.

Psixologiya Elmi-Tədqiqat İnstitutu nəzdində fəaliyyət göstərən Psixoloji Xidmət və Reabilitasiya Mərkəzinin psixoloqu, Nəzəri və Eksperimental Psixologiya şöbəsinin elmi katibi Səbinə Ələkbərova "İradə, məqsəd, uğur - idarəetmənin əsas amilləri" mövzusunda çıxış etdi.

Daha sonra Psixologiya Elmi-Tədqiqat İnstitutu nəzdində fəaliyyət göstərən Nəzəri və Eksperimental Psixologiya şöbəsinin müdiri, ADPU-nun Ümumi Psixologiya kafedrasının baş müəllimi, psixologiya üzrə fəlsəfə doktoru, NLP təlimçisi Məhərrəm Əliyev "İnsan Resurslarında NLP-nin imkanları" mövzusu üzrə çıxış edərək forum iştirakçıları ilə qarşılıqlı müzakirə əsasında təlim təşkil etdi.

Psixologiya Elmi-Tədqiqat İnstitutu nəzdində fəaliyyət göstərən Psixoloji Xidmət və Reabilitasiya Mərkəzinin psixoloqu, "Gənc Tədqiqatçılar" komandasının rəhbəri Fuad Əsədov isə "İnsan təfəkkürünün potensialı, mnemotexnikalar" mövzusu üzrə çıxış etdi.
Forumun sonuna doğru psixoterapevt Kənan Rəhimov təkrar çıxış edərək “Praktiki Stress Menecment, Reinkarnasiya” mövzusunda birbaşa praktik əsaslı təlim təşkil etdi. 
İnteraktiv keçən forumun sonunda institutun rəhbəri Elnur Rüstəmov qapanış nitqi edərək spikerlərə və əməyi keçən hər kəsə təşəkkürünü bildirdi, bütün iştirakçılara uğurlar arzuladı.
Forum spikerlər tərəfindən iştirakçılara sertifikatların təqdim edilməsi ilə yekunlaşdı.

AMEA Gənc Alim və Mütəxəssislər Şurası və Narınc Uşaq Psixologiya Mərkəzinin təşkilatçılığı ilə Azərbaycanda ilk dəfə olaraq "I Beynəlxalq Ailə və Uşaq Psixologiyası konfransı” keçirilir. Konfransdan öncə AMEA Mərkəzi Elmi Kitabxanasında rəsmi açılış mərasimi baş tutdu.
200-ə yaxın iştirakçının, o cümlədən tanınmış yerli və xarici mütəxəssislərin qatıldığı konfransı giriş nitqi ilə AMEA Gənc Alim və Mütəxəssislər Şurasının sədri, dosent Famin Salmanov açdı. O bildirdi ki, konfrans son zamanlar ölkəmizdə və dünyada aktual olan ailə və uşaq psixologiyası sahəsindəki problemlərin müxtəlif aspetdən müzakirəsini daha iri miqyasda təmini cəhətdən önəmlidir: "AMEA-nın Fəlsəfə İnstitutu və digər təşkilatlarda bu cür məsələlərin müzakirəsi, ailə və uşaq psixologiyasına dair tədqiqatlar dissiplinar və multidissiplinar yanaşma müstəvisində fundamental elmi problem kimi öyrənilməkdədir. Bu istiqamətdə tədqiqatların aparılmasında gənc tədqiqatçıların da rolu müstəsnadır. Bu gün ərsəyə gətirilən konfrasda yerli tədqiqatçılar üçün dünya təcrübəsinin öyrənilməsi, eyni zamanda aparılan araşdırmaların nüfuzlu mütəxəssislərlə birgə müzakirə olunması faydalı olacaq. Ümid edirəm ki, qarşılıqlı faydalı müzakirələr uşaq və ailə psixologiyasının aktual problemlərinin həllinə öz töhfəsini verəcək”.
Narınc Uşaq Psixologiya Mərkəzinin rəhbəri, klinik psixoloq Narınc Rüstəmova dedi ki, konfrans 1 İyun Uşaqların Beynəlxalq Müdafiəsi Gününə həsr olunub: "Eyni zamanda bizim mərkəzin 8 yaşı tamam olur. İki bayramı bir arada qeyd edirik. Layihədə əməyi olan, iştirak edən hər kəsə təşəkkürümü bildirirəm. Bu bir uşaq və ailə konfransıdır. Burada önəmli olan ailə üzvlərinin bir-birinə olan hörməti, dəstəyidir. Biz həmişə uşağı qabardırıq, amma uşaq sağlam mühitdə böyüməsə, necə sağlam gənc, vətəndaş olacaq? Ona görə uşaqları tərbiyə edərkən birinci özümüzdən başlamalı olduğumuzu düşündüm. Öz sahəsində peşəkar olan insanları dəvət etmişik, inanıram ki, hər kəs üçün faydalı olacaq”. 
Ailə, Qadın və Uşaq problemləri üzrə Dövlət Komitəsinin sədr müavini Sədaqət Qəhrəmanova isə qeyd etdi ki, konfrans ailə və uşaq psixologiyası sahəsində olan problemlərin həlli istiqamətində bir çağırışdır: "Çox məsuliyyətli, həyati əhəmiyyətli bir mövzu müzakirə olunacaq. Dünya bir ailədir, o ailənin üzvləri isə dövlətlərdir. Hər dövlətdə isə əhəmiyyətli olan ailələrdir. Hər bir ailədə nə baş verirsə, onun əks-sədası cəmiyyətdə, dünyada olur. Bu gün dünyada baş verən terrorlar, münaqişələr, zorakılıqların hamısı uğursuz ailələrdən, baxımsız uşaqlardan əmələ gələn proseslərdir. Bu gün bu konfransın keçirilməsi cəmiyyət üçün böyük bir çağırışdır. Əgər xoşbəxt yaşamaq, dünyamızın, insanlarımızın üzünün gülməsini istəyiriksə, ailə münasibətlərinin doğru-düzgün olması üçün hər bir kəs çalışmalıdır”.
Daha sonra AMEA Fəlsəfə İnstitutunun fəlsəfə, sosiologiya və sosial psixologiya  şöbəsinin rəhbəri Rəfiqə Əzimova, ilahiyatçı alim Hacı Surxay Məmmədli, Türkiyədən gələn qonaqlar psixoterapevt klinik refleksoloq Esat Başaran, psixoloq Tancu Ekinçi, Psixologiya və Konsultasiya Mərkəzinin rəhbəri, psixoloq Elnur Rüstəmov və digəriləri konfransla bağlı fikirlərinin bildirdilər.
Təbrik çıxışlarından sonra konfransın plenar iclasında nüfuzlu əcnəbi və yerli psixoterapevtlərin, klinik refleksoloqların və psixoloqların təqdimatında məruzələr dinlənildi.

Narınc Uşaq Psixologiya Mərkəzinin Xalqlar Dostluğu ofisinin icraçı direktoru Təranə Kazımlı Türkiyədə Üsküdar Universitetində 28-30 aprel tarixi aralığında keçirilən “ I Avrasya pozitiv psikoloji kongresi”ndə ölkəmizi təmsil etmişdir. Konfransın keçirilməsində əsas məqsəd Pozitiv Psixologiya ilə bağlı bütün elmi araşdırılmaların paylaşılması və bu sahədə çalışan dünya mütəxəssislərinin bir araya gəlməsi idi.  Konfransın proqramında dünyanın müxtəif ölkələrindən gəlmiş mütəxəssislərin təqdimatında Pozitiv Psixologiya ilə bağlı müxtəlif mövzulu seminarlar,  qrup çalışmaları, bildirişlər və posterlərin tanıtımı yer almışdır.  

3 gün davam edən konfransda Narınc Uşaq Psixologiya Mərkəzini icraçı direktoru Təranə Kazımlı həm ölkəmizi,həm də Narınc Uşaq Psixologiya Mərkəzini layiqincə təmsil etmişdir!!!

02.04.2016 tarixində “Narınc Uşaq Psixologiya Mərkəzi“(NUPM) və “Autizm Defektoloji və Psixoloji Yardım Mərkəzi”(ADPYM) İctimai Birliyi tərəfindən 2 Aprel Dünya Autizm məlumatlandırma günü ilə əlaqədar olaraq Bakı Olimpiya stadionunda “Mavi İşıqla İşıqlandır və Autizmi tanı” adlı tədbir keçirildi.

XXI əsrin qlobal problemi hesab edilən autizm  ölkəmizdə də ən aktual bir mövzudur.Aparılmış tədqiqatlara görə dünya əhalisinin 1 faizi yəni 70 milyon əhali autizmin qurbanıdır. Qeyri-rəsmi stastistikamıza əsasən ölkəmizdə  təxmini 4000 yaxın uşaq autizm sindromundan əziyyət çəkir.Getdikcə bu say artmaq üzrədir. Yaranma səbəbi elmə 100% məlum olmayan autizm sindromu ilə mübarizə günün tələbidir.Keçirilən tədbir zamanı ölkəmizdə məşhur və görkəmli binalardan hesab edilən Bakı Olimpiya Stadionu mavi işıqla işıqlandırılaraq Biz də autizmin fərqindəyik mesajı verildi!

 Tədbirdə aidiyyatı dövlət və qeyri-dövlət təşkilatları nümayəndələri, mütəlif səfirlik təmsilçiləri və türk mütəxəssisləri, KİV-nin nümayəndələri , görkəmli xalq şairi, aktyor və ilahiyyatçılar ,eyni zamanda autizm sindromlu uşaqlar,valideynlər və digər qonaqlar iştirak etdilər.

Tədbirin gedişatı zamanı gələn rəsmi məlumatlara əsaslanaraq şəhid olan hərbi qulluqçularımızın da ruhu dərin təəssüf hissi ilə yad edildi və bütün qonaqların iştirakı ilə şəhidlərimizin ruhu 1 dəqiqəlik sükutla yad edildi!

Tədbir rəsmi və qeyri rəsmi hissədən ibarət oldu. Rəsmi hissədə ilk öncə söz tədbirin təşklati qurumlarının rəhbərlərinə verildi. Psixologiya və Konsultasiya Mərkəzinin rəhbəri, psixoloq Elnur Rüstəmov, Narınc Uşaq Psixologiya Mərkəzinin rəhbəri,psixoloq Narınc Rüstəmova və Autizm Defektoloji və Psixoloji Yardım Mərkəzi İctimai Birliyinin sədri Çiçək Qəzənfərqızı tədbirin ərsəyə gəlməsiylə bağlı çıxış edərək,qonaqları salamladılar.  Daha sonra iştrak edən digər qonaqlar Fəlsəfə elmləri üzrə fəlsəfə doktoru,AMEA-nın fəlsəfə,sosiologiya və sosial psixologiya şöbəsinin müdiri Rəfiqə Əzimova, Azərbaycan Respublikası Səhiyyə Nazirliyi nəzdində Psixi Sağlamlıq Mərkəzinin rəhbəri,tibb elmləri doktoru, professor Fuad İsmayılov, Ombudsmanın əlilliyi olan şəxslər üzrə aparatının müşaviri Müqalib Mahmudv, Fələstin,Sudan və Çexiya Səfirlərinin  xanımları, Əməkdar incəsənət xadimi, şair Baba Vəziroğlu, ilahiyyatçı-alim, “İçərişəhər” cümə məscidinin axundu Hacı Surxay Məmmədli və digərləri söz alaraq tədbir və günün mahiyyətini əks etdirən nitq ilə çıxış etdilər və Tədbir təşkilatçılarının bu cür ali təşəbbüsə görə təbrik etdilər və hər zaman bu kimi layihələrə dəstək olmağa hazır olduqlarını bildirdilər.

2 aprel günü Narınc Uşaq Psixologiya Mərkəzinin 7 illik yubileyi də qeyd edildi. Narınc Uşaq Psixologiya Mərkəzinin rəhbəri, psixoloq Narınc Rüstəmova qeyd etdi ki, “Bu gün onun üçün hər iki cəhətdən də əlamətdər bir gündür. Mərkəzinin yaranma tarixinin məhz 2 aprel Beynəlxalq Autizm Marifləndirmə günü ilə üst-üstə düşməsi heç də təsadüfi deyildir! İllərdir prinsipimizə sadiq qalaraq hər zaman balalarımıza əlimizdən gələn bütün köməkliyi göstərmişik və bunun nəticəsi olaraq valideynlər tərəfindən qazandığımız təşəəkür, boyük etimad və sevgi hissi bizim ən böyük uğurumuzdur!”

Tədbirin qeyri-rəsmi hissəsində kiçik qonaqlar əyləncəli müsiqilər, şoular, cizgi film personajları, şən klounlarla gözəl vaxt keçirdilər və uşaqlara müxtəlif hədiyyələr təqdim olundu.

09.04.2015 tarixində Xəzər Universitetində Psixologiya və Konsultasiya Mərkəzi, DÜŞÜNCƏ Psixologiya Jurnalı və Xəzər Universitetinin birgə layihəsi olan "CREATİVE AUTHOR" müsabiqəsinin yekun mükafatlandırma mərasimi baş tutdu.

Tədbir Mələk Kərimovanın açılış nitqi və Xəzər Universitetinin Psixologiya fakultəsinin III kurs tələbəsi Nərmin Quliyevanın ingilis dilindən tərcümə etdiyi , müəllifi Viktor Franklın olduğu “İnsanın məna axtarışı” kitabının təqdimetmə mərasimi ilə başladı. Daha sonra söz AMEA-nın elmi işçisi, Psixologiya və Konsultasiya Mərkəzinin rəhbəri, psixoloq Elnur Rüstəmova verildi. Elnur Rüstəmov günümüzdə psixologiyanın inkişaf vəziyyəti, bu cür müsabiqələrin psixologiyanın inkişafında önəmindən danışdı. Eyni zamanda Nərmin Quliyevanın tərcümə etdiyi kitab haqqında öz fikirlərini bildirərək, gəncləri bu kimi işlərdə daha da aktiv olmağa səslədi.

Daha sonra Xəzər universiteti HR departameninin rəhbəri, psixologiya fakultəsinin kafedra müdiri, psixoloq Ülkər İsayeva söz alaraq iştirakçılarımız təbrik etdi. 

Tədbirdə müsabiqənin əsasını təşkil edən  “Depressiya və Suisid” mövzusunda hüquqi aspektdən yanaşması üçün hüquqşünas  Akif Əlizadə, fəlsəfi askpektən yanaşma üçün fəlsəfə kafedra müdiri Mail Yaquba söz verildi.

Qeyd edək ki, müsabiqə çərçivəsində 100-ə yaxın məqalə qəbulu olmuşdu  və yekun mükafatlandırma mərasimində onlardan 35 –i peşəkar münsiflər heyyəti tərəfindən seçilərək təltif olundu.

Birinci yerin qalibi “Birinci və sonuncu ad günüm” yazısıyla müsabiqəyə qatılan Samir İmanov oldu. İkinci və üçüncü yerləri isə Xəzər universiteti,psixologiya fakultəsi III kurs tələbəsi Aydan İbrahimova və Bakı Türk Anadolu liseyinin 11-ci sinif şagirdi Bəyimxanım Bəhməni  paylaşdı.

Tədbir Xəzər universitetinin təsisçisi və rektoru, professor Tamerlan İsaxanın qapanış nitqi ilə başa çatdı.

Psixologiya və Konsultasiya Mərkəzinin rəhbəri, psixoloq Elnur Rüstəmov, Narınc Uşaq Psixologiya Mərkəzinin rəhbəri, psixoloq Narınc Rüstəmova və "Düşüncə" Psixologiya Jurnalının baş redaktoru, psixoloq Vüsalə Ələkbərova Sankt-Peterburqda keçirilən "Qlobal çağırışlar epoxasında psixologiya və psixoterapiya" konfransında iştirak ederek Azərbaycanı orada təmsil edirlər.

Psixologiya və Konsultasiya Mərkəzinin klinik psixoloqu Dr. Orxan Fərəcli 14-18 sentyabr 2014-cü il tarixində, İspaniyanın Madrid şəhərində keçiriləcək "XVI Ümumdünya Psixiatriya Qurultayı"nda Azərbaycanı təmsil edəcək.

Orxan Fərəcli haqqında məlumat:
Azərbaycan Beynəlxalq Universitetinin müalicə-profilaktika fakültəsinin məzunudur. 
2006 - 2010-cu illər Azərbaycan Respublikası Səhiyyə Nazirliyinin 1 saylı Respublika Psixiatriya Xəstəxanası tibb qardaşı;
2010 - 2011-ci illər Azərbaycan Respublikası Səhiyyə Nazirliyinin 1 saylı Respublika Psixiatriya Xəstəxanası İnternatura;
2011 - indiyədək Azərbaycan Respublikası Səhiyyə Nazirliyinin 1 saylı Respublika Psixiatriya Xəstəxanası həkim psixiatr;
2013 - indiyədək Xəzər Universitetində Klinik Psixologiya fənni üzrə tədris müəllimi;
2013-cü ildə Ankara Nümunə Təhsil və Araşdırma Xəstəxanasında 3 aylıq ixtisasartırma kursu keçib.
Azərbaycan Psixiatriya Assosiasiyasının üzvüdür. Bu sahədə keçirilən Respublika və beynəlxalq səviyyəli tədbirlərin iştirakçısıdır.
2009 - indiyədək Psixologiya və Konsultasiya Mərkəzində (PCC) Klinik psixologiya sahəsində təlimlər və fərdi konsultasiyalar aparır.